Ég er löggiltur öryrki,hlusta á HLH og Brimkló

Ég er löggiltur hálfviti,læt hafa mig að fífli,styð markaðinn

Egó, Rækjureggea

Haukurinn er skrópagemlingur. Dagurinn átti að byrja með eðal fyrirlestri um socialkonstruktivisma klukkan átta fimmtán, en Haukurinn var þreyttur og latur. Haukurinn ákvað að sitja frekar heima við og lesa lektíur. Þrátt fyrir visst samviskubit er Haukurinn eigi illa haldinn og mun eiga láta bugast af téðu biti - þó er slíkt hið sama ekki hægt að segja um öll hans mörgu mýflugnabit.

Haukurinn er á barmi taugaáfalls sökum mýbita. Hvers vegna Haukurinn má ekki sitja í friði í kvöldroðanum í 15 til 20 gráðu hita úti í garði með einn öl (eða tvo) er honum með öllu óskiljanlegt. Mýin virðast dragast að honum líkt og....hömm....mý að mykjuskán.

Samferðamaður Hauksins í þessari síbreytilegu ferð sem við köllum lífið, tjáði honum að mýin sæktu meira í blóð sem inniheldur mikið magn af testósteróni. Samkvæmt þeim rökum er Haukurinn við það að sprengja skalann hans Hjalta Úrsusar. Haukurinn er karlmenni.

Bardaíþróttaþreyfingar Hauksins hafa einnig hafist á ný, og því er Haukurinn haldinn ýmiskonar kvillum, eymslum og sperrum. Þetta þýðir að þegar öllu er á botninn hvolft þá er Haukurinn í einstöku lamasessi þessa dagana - líkt og fleiri.

En eigi þýðir að gráta Björn bónda heldur safna liði - skilið í þeirri merkingu að Haukurinn ætlar að leggja minnstu fiðlu í heimi á hilluna og snúa sér aftur að því að njóta lífsins.

Haukurinn hefur talað!

P.s. Gleðilegan flöskudag - með kærum mjaðarkveðjum frá hinu danska smáríki.

Spáðu í mig og þá mun ég spá í þig.....

Spáðu í mig (kvöldin eru kaldlynd), Meistari Megas

Haukurinn kveður sér hljóðs úr horni. Héðan er fátt að frétta sem einhverju máli skiptir. Skólinn er hafinn og er hann allur af hinu góða; ísskápurinn er aftur fullur, sem einnig er af hinu góða og Haukurinn er latur, sem kannski er ekki af hinu góða.

Haukurinn er úr sér genginn, eins og gamall skór. Sumarið tók sinn toll og Haukurinn þarf á fríi að halda. Úr því verður víst ekki í bráð, því framundan eru þrjú próf, jól og áramót, og eitt stykki barneignardót. Fyrir þá sem ekki eru með á nótunum, þá er kerla með barni, eða eins og Danir myndu segja: "hun er simpelthen blevet bollet tyk...."

Fyrir þá sem eru áhugasamir um ofangreint er bent á síðu kerlunnar.

Haukurinn nennir ekki að blaðra meira, en er samt ánægður með árangurinn.

P.s. Hvað er málið með reiðhjólamenn sem láta sig renna niður brekku þegar maður sjálfur er að springa á limminu við það að hjóla upp í móti? Þurfa þeir alltaf að vera með svona sjálfumglatt glott?