East is East.....
Haukurinn hefur verið hugsi síðustu dægur. Hann hefur rekið augun í það æ meir, hversu fáir Íslendingar eru í raun og veru. Honum fannst magnað á Neistaflugi í Neskaupsstað, þegar hann gerði sér grein fyrir því að Guðni Ágústsson og Jóhannes eftirherma eru einn og sami maðurinn. Það var þegar Jóhannes "hermdi" eftir Guðna að Haukurinn gerði sér grein fyrir því að hér væri einfaldlega um einn og sama manninn að ræða. Þegar Guðni hefur komið fram opinberlega þá er hann ávallt hnyttinn og skemmtilegur, eins og Jóhannes, og svo hafa þeir einfaldlega sömu röddina. Enda hvaða stjórnmálamaður er nógu fyndinn til þess að hvetja ungvið þjóðarinnar til þess að borða meiri pylsur?
Haukurinn datt ofan í annað samsæri í gærkveldi þegar hann sá íslenska landsliðið etja kappi við kalna leikmenn Suður-Afríku. Þegar myndavélin skipti örsnöggt á Tryggva Guðmundsson, leikmann FH, varð Hauknum ljóst að hér var kominn enginn annar en Sveppi úr Strákunum - þó án gærunnar. Haukurinn skammast sín fyrir að hafa ekki gert sér þetta ljóst fyrr.
Haukurinn rak einnig annað augað í morgunsjónvarpið í morgunbítið í morgun. Þar höfðu hinir misgáfulegu vertar, Gulli Helga og hún þarna hin sem enginn veit hver er, boðið eina manninum í heiminum í rökræður sem þau vissu að þau hefðu eitthvað roð í, nefnilega Gunnar í Krossinum. Og hvert var umræðuefnið spyrjið þið kannski, kæru lesendur? Nema giftingar, ættleiðingar og tæknifrjóvganir samkynheigðra einstaklinga. Það að ræða homma og lesbíur við Gunnar í Krossinum er, eins og kaninn segir það, eins og að skjóta fisk í tunnu. Maður veit alltaf að hvar maður hefur bókstafstrúarmann af gamla skólanum, sem varpar fram einu "Hallelúja" eða "Ritningin segir...." eða "Guðs orð segir..." og því getur maður endalaust nuddað honum upp úr þessum óvinsælu skoðunum þangað til að kýrnar snúa aftur heim. Það er ekki málefnaleg umræða að bjóða fólki í viðtal til þess eins að drulla yfir það. Þó svo að Haukurinn sé ekki sammála Gunnari í Krossinum, þá er hann tilbúinn að virða það við hann að hann hefur sína skoðun á málinu og hún er ekkert endilega röng, þó svo menn séu almennt ekki sammála henni. Til dæmis finnst Hauknum allir aðstandendur Íslands í Bítið vera fífl, og menn mega alveg vera ósammála því ef þeir svo kjósa....þó að það sé rangt.
Haukurinn hefur talað!
