Hólí rösted mettal batman....!

Haukurinn er ennþá kvefaður. Hann sendir matreiðslumannsnemanum aftur góðar þakkir fyrir!

Haukurinn er í klípu. Hann á að skila einu verkefni í lok desember, en var einnig að uppgötva að honum ber einnig að skila einkaverkefni á dönsku um heimspeking að hans vali í lok janúar. Nú eru góð ráð dýr! Haukurinn er búinn að taka ákvörðun að skrifa um franska heimspekinginn Jean Baudrillard, sem að mati Hauksins er eitt það mesta kex sem um getur!

Hauknum ber að hringja á pípara um níu leytið. Það lekur víst úr loftinu í íbúðinni fyrir neðan Haukinn þegar hann er í sturtu. Haukurinn sér ekki alveg vandamálið, því íbúarnir fyrir neðan gætu séð sér leik á borði og sparað vatnsreikninginn og farið í sturtu á sama tíma og Haukurinn. Daninn er ekki beint hagsýnasta fyrirbæri á jarðkringlunni.

Haukurinn fékk um daginn ansi hreint skemmtilega máltíð. Hauknum var boðið í pössun til Skraddarans og Matreiðslumannsnemans og var þar boðið upp á flatbökur. Það í sjálfu sér er ekkert merkilegt, nema það að þessi flatbaka var þakin fersku salati, hráum lauk, nýjum tómötum og gúrkum. Þetta var afurð kebab-flatbökubakarans á horninu og bragðaðist býsna vel, en var furðulegt við fyrstu sjón.

Haukurinn kveður og sektar sjálfan sig um 5 bloggstig (ísalands-style) fyrir óáhugaverða umræðu!

Haukurinn hefur talað!

Æ fíl prittí!

Haukurinn er kvefaður. Haukurinn kennir ákveðnum matreiðslumannsnema um þetta kvef sitt og veit sá hinn sami hver hann er!

Haukurinn situr enn og aftur við tölvuna góðu, með Orðið (frá microsoft) opið og autt blað fyrir framan sig á skjánum. Kaffibollinn og "beikonið" eru að sjálfsögðu á sínum stað og Ozzy glymur í spilaranum með Járnmanninn góðkunna. Að mörgu leyti veit þessi blanda ekki á gott, en Haukurinn vonar að hún skili einhverri vinnu. Eins og vestur-víkingarnir segja "It's balls to the walls time!" sem útleggst á hinu ástkæra ilhýra "Það er tími fyrir bolta að vegg!".

Haukurinn hefur fregnt það að Svarti maðurinn haldi víst heljar afmælisteiti í bráðinni, en harmar það að geta eigi verið viðstaddur. Haukurinn fullvissar hinn fyrrnefnda að úr því verði bætt þegar Haukurinn gerir landhögg á ný. Þangað til verða menn bara að gjöra svo vel að heiðra minni Hauksins og slátra nokkrum honum til heiðurs.

Héðan frá borg álanna við Limafjörð er fátt að frétta, mikil verkefnavinna, veðrið rólegt og að síga í frost, en Haukurinn umfram allt fyr og flamme og í góðum húmor.

Að lokum vill Haukurinn senda Villikettinum smá kveðju: "¡La buena suerte con sus exámenes, mi amigo! ¡Rompa una pierna! "

Haukurinn hefur talað!