Hí wörks hard for ða moní...aha aha.....só hard for ða moní....!

Peningar eru eitthvað sem skiptir námsmenn miklu máli. Einkum er það sú staðreynd að þeir eiga alltaf of lítið af þeim og þá langar ávallt í meiri peninga. Ef lesendur vilja dæmi, þá er þeim t.d. bent á þær nauðbeygðu hræður sem kasta sér út í endurskoðun eða sérfræðinám í meltingarfærasjúkdómum. Það sér það hver heilvita maður að rassalækningar eru ekki eitthvað sem mann dreymir um frá unga aldri. Allt snýst þetta á endanum - hahahaha- um peninga.

Haukurinn sér ekki mikið af peningum, en þó meira en margir aðrir. Lesendum eru eflaust minnugir skrifa Hauksins um Pawel hinn pólska sem bókstaflega lap dauðann úr skel. Samt sem áður hefði hann alveg áhuga á því að öðlast aukna fjármuni, en er þó samt sem áður ekki reiðubúinn að gjöra hvað sem er til þessa arna. Haukurinn hefur oftar en eigi séð einstaklinga í öðru ljósi eftir að þeir fremja ýmis konar verknaði til þess eins að safna auði.

Flestir lesendur kannast eflaust við skosku kempuna, Sean Connery, úr hlutverki sínu sem njósnarinn knái 007 eða James Bond. Færri muna þó eftir mynd hans er Zardoz heitir. Þar fer Sean mikinn sem villimaðurinn Zed úr framtíðinni, sem berst við yfirvöld jarðar framtíðarinnar íklæddur rauðri bleyju og byssubelti. Haukurinn og félagar eru þess fullvissir að handritshöfundarnir hafi fengið mestan sinn innblástur úr ógrinni sýrufrímerkja, því söguþráðurinn - ef hann er til staðar - er þvílík steypa að engu er líkt.

Ofannefnd mynd hefur líklegast verið gerð, líkt og flestar kvikmyndir, í þeim tilgangi að skapa auknar tekjur til handa þeim er að henni stóðu. Hvort það tókst veit Haukurinn eigi en eitt er víst að enginn annar tilgangur er sjáanlegur með gerð Zardoz. En Haukurinn hvetur samt sem áður lesendur til þess að reyna að nálgast myndina, þó að eingöngu væri sér til skemmtunar.

Annað gott dæmi, og örlítið nærtækara fyrir þá lesendur sem eru búsettir á Íslandi, er dúkka sem Haukurinn rakst á um jólin. Nefnilega Birgittudúkka, gjörð í líkneski Birgittu Haukdal, óskadóttur Íslands. Haukurinn hefur að vísu frekar sterkar skoðanir þegar talið berst að dúkkum ýmiskonar þar eð þær hræða hann eilítið - eitthvað með þetta uppstoppaða ungabarn sem ekki er að virka sem og dauðu augun - en eitt það hræðilegasta sem hann hefur augum litið er ofannefnd Birgittudúkka. Hversu mikil hugsun, ef einhver, lá að baki þessum ófögnuði veit Haukurinn eigi en hitt er víst að þessi holdgervingur hins illa situr eflaust í ótal herbergjum víðsvegar um Ísland og skipuleggur byltingu. Hver tilgangurinn var er samt sem áður eflaust augljós, að skapa elskunni henni Birgittu auknar tekjur meðan hún er ennþá söluvæn. Það að hún virðist hafa þurft að fórnu sálu sinni á móti virðist ekki angra neinn.

Það eitt er víst, að margur verður hreinlega af aurum api!

Haukurinn hefur talað!